De Europaeis reclamantibus

Latius diffunduntur reclamationes contra severitatem oeconomicam populis a gubernatoribus impositam iussu Argentariae Europaeae.

Die XXVI mensis Septembris tertium Graecorum universale operistitium huius anni, primum contra regimen a Samaras ducto, habitum est: nam incolarum status oeconomicus dudum in peius mutatur. Die XXIX Septembris XX milia Hispanorum Madriti fora viasque quiete invaserunt contra deminutas impensas publicas, quae scholas, nosocomia, ludos infantum ad miseras condiciones redigunt: multitudo ante senatum convenit, regiminis abdicationem magna cum voce postulans. Eodem die et Athenis et Olisipone eadem causa reclamabatur.

Etiam in Gallia sinistrae partes regimini socialistico a Francisco Hollande ducto opponuntur, pridie Kalendas Octobres Lutetiae fora occupantes: omnes factiones laevae populum convocaverunt, summatim circiter L milia congregantes (inde imago adposita). Die VIII Octobris operariorum societates similiter colligentur, auxilium ad difficultates oeconomicas superandas postulantes: nam plurimae officinae ab opera desistunt operarios ad otium compellentes.

Scripsit Herimannus Novocomensis