Sina propinqua est

Cinematographicae italicae pelliculae titulus est, in qua, praeter cetera, iuvenes rerum novarum ardenter cupidissimi fingebantur qui “libellum rubrum”, a Mao Tse Tung scriptum, manibus agitabant et metum severioribus hominibus iniciebant. Re vera his annis Sina magis magisque Europae propinqua facta est. Sed multa sunt specula, ex quo consuetudo cum Sinis est. Estne qui Marcum Polum, venetum mercatorem, ignoret qui, in Sinam postquam pervenit, familiarissimus imperatori factus est ita ut ab eo legatus creatus sit? Etiam nunc Marci Poli nomen Sinae laudant, amicitiae symbolum inter Sinam et Italiam. Saeculis praetereuntibus ex Europa in Sinam mercatores pervenerunt, sed etiam sacerdotes de propaganda fide et postremo … exercitus ad colonias maritimas condendas, quare bella exorta sunt. His annis etiam Sinae Europam invaserunt, non armis sed vestimentis, puerorum crepundiis, arte coquinaria ceterisque rebus saepe parvi praetii.

Annis praeteritis contra plurimae Sinae in paupertate vivebant et impediebantur quominus in externas nationes migrarent. Mutata autem rei publicae administratione (etsi regimine communistico permanente), multi Sinae industriae causa in Italiam pervenerunt, multi Italici vicissim in Sinam eadem causa pervenerunt. In Italia multi sinenses discipuli in ludos eunt. Parentes propinquis in Sina viventibus pueros tradunt ut illic severam disciplinam in studendo et vivendo discant; hi in Italiam ducuntur decem (aut undecim) annos nati sed paulum familiariter cum ceteris discipulis vivunt, cum linguam italicam omnino ignorent. Si autem Sinae in Italia in lucem veniunt, sine ulla difficultate in ludis novam linguam discunt et cum condiscipulis familiariter vivunt. Cum multi sint in Italia sinenses discipuli, perpauci italici contra sinensi loquantur, cumque sit, autem, utilissimum sinensi loqui atque ideogrammata comprehendere (commercii aut variarum consuetudinum causa), magis magisque fit ut in nonnullis ludis (septentrionalibus praesertim) sint quidam magistri qui sinensem linguam doceant; aestatis tempore discipuli in Sinam perveniunt, ubi eius linguam penitus student atque discunt. Permulti gallice, anglice, germanice, hispanice et italice, perpauci autem sinensi loquuntur; his sine dubio opus non deerit, cum permultis desit.

Scripsit Dominicus Caveosanus