Annus
2 0 1 2


Factiones Armatae Rebelles Columbianae (

Factiones Armatae Rebelles Columbianae (FARC)

Ut breviter nuper (26/2/2012) nuntiaveramus Factiones Armatae Rebelles Columbianae (FARC), quae sunt quidam manipulus tromocraticus, se posthac a raptibus abdicaturas esse affirmaverunt; huic manipulo mos est innocentes eripere et in silvis Columbiae obsides retinere, eo consilio ut aut redemptionis pretium a parentibus agnatisque aut sociorum reorum, qui in carcere custodiuntur, libertatem ab auctoritatibus publicis postulet.

Unde ortae sint hae Factiones? Anno 1948º Bogotae, in urbe capite Columbiana, Georgius Gaitán, advocatus egregius et notissimus, qui factiones politicas sinistras gerebat, die 9º mensis Aprilis paulo post meridiem in media urbe palam interfectus est; inde ortus ubique tumultus, nam populus, qui Georgium Gaitán patronum suum habebat, in vias et plateas fecit magnos concursus, aliqua aedificia vehiculaque incendit, cum custodibus publicis acriter pugnavit. At non solum in oppidis sed etiam in agris tumultus fiebant; latifundorum igitur domini, quod magnam rebellionem timerent, manus armatas quae agros pacarent miserunt; exercitus gubernamentalis et adfuit; agrestes tunc alii in oppida profugerunt, alii arma in latifundistas sumpserunt, quod Factionum FARC fuit initium; praedones quoque occasionem nacti villas rusticas populabantur; hi omnes saepe immane crudeliterque egerunt.

Ut putatur, Fationes FARC a Republica Bolivariana (id est, Venetiolana) foventur; certum esse dicitur atque Hugonem Chávez  cum tromocratum ideologia congruere atque Factiones in mercandis stupefactivis interesse. Hugo Chávez anno 2008 in duabus mulieribus liberandis tantopere interfuit ut non solum aptum mediatorem, sed potius rebellium procuratorem legatumve se gessisset.

Quaedam mulier, ex obsidibus tunc liberata, narravit obsides militares et custodes publicos, qui adhuc penes Factiones FARC permanent, catenis ad collum totum diem vivere, et victum fere semper eundem omnibus obsidibus habere: oryzam cum pisis, faseolis lentibusve; cum vero animal silvestre forte quidam obses (non miles) caperet, carnem comedere posse; in lectulis pensilibus aut super plasticos in solo positos dormire; ibi auxilium medicum esse nullum, nullam in morbo gravi spem; obsides paludismo insectorumque morsibus, qui plagas leprae similes gignunt, esse affectos.

Chávez enim quondam postulavit Factiones Armatae Rebelles Columbianae non in tromocratibus sed in organizationibus, quae praedispositionem politicam moliuntur, numerari oportere, quorum membra totam Americam armis liberare cupiunt (tromocrates vero putantur non ab nomine sed ab ipsorum facinoribus).

Factionum FARC dux olim habebatur Emmanuelis Marulanda Vélez, dictus etiam vernacule "Tirofijo" (quod nomen posset Latine reddi "Certus-ictus", nam quo scepletum collineabat ibi telum inferebat). Hic natus anno 1930º, Factionum abhinc annis quinquaginta conditor, anno 2008 mortuus est, ex quo fit ut Factiones in discrimine pervenerunt quoniam, cum non facile dux suus eligendus esset, sese in varios manipulos segregaverint. Praeterea Hugo Chávez gravi morbo affectus forte auxilium Factionibus FARC iam ferre non potest vel non vult. Haec possint esse causae ex quibus Factiones nuntiaverunt indutias atque decem militum libertatem.

Scripsit Paulus Kangiser



Retro ad:

Novissima editio
Summum paginae