Annus
2 0 1 2


Diplomato geometra,

Carolus Rambaldi

Aetate provectus die X mensis Augusti mortem improvisam obiit Carolus Rambaldi, vir totius orbis amantibus artis cinematographicae dilectissimus.

Natus anno MCMXXV in parvo vico Ferrariae proximo, ab initio monstra fictilia in taeniis cinematographicis Italicis ostendenda conficere didicit, ut spectatorum animi novis imaginibus excitarentur: nam illo tempore spectacula talia nuper divulgari coeperant. Quorum primus fuit draco Fafner ad Sigfridi fabulam ab auctore Jacobo Gentilomo agendam. Etiam cum Marco Ferreri (Magna ingurgitatio), Petro Paulo Pasolini et Dario Argento (Rubrum profundum) annis subsequentibus effectus mirabiles creavit, deinde in Americam vocatus est, ut pelliculis Acrifoleti (Hollywood) conficiendis operam daret: nova ars inde creata est, cui nomen est "machinatronica", id est machinas scaenicas instrumentis electronicis gubernatas fabricari. Quibus tanto cum ingenio excelluit, ut ter praemio Ansgariano effectuum visibilium gratia exornatus sit: saeculi praeteriti anno LXXVI cum gorillam "King Kong" simulacrum XII metra altum cum vultibus varia sentientibus exstruxit, deinde pellicula scientiae fictae "Alieno" auctoris Americani Ridley Jones, denique notissima puerisque eius temporis cara "E.T. Extra Terram creatura" ("TELEPHONIUM DOMUM"), anno MCMLXXXII favente Stephano Spielberg summo pellicularum auctore et fabro, quocum etiam "Conventus proximos generis tertii" confecit.

Lametiae Thermis, in oppido Calabro uxoris suae quo iam diu recesserat, brevi et inopinato morbo affectus mortuus est. Institutum tamen anno bismillesimo a se conditum relinquit, ubi iuvenes difficilem artem effingendi hodiernis instrumentis discant.

Cuius dictum proprium fuit: Animi motibus imago praebenda est.

Scripsit Herimannus Novocomensis



Retro ad:

Novissima editio
Summum paginae