Annus
2 0 1 2


DE IDIBUS MARTIIS

De Idibus Martiis

(The Ides of March)

Idus Martiae, a nece Iulii Caesaris patrata anno quadragesimo quarto a.Ch. n., imagines sunt necis et rei politicae conspirationis.

Nam opus filmicum Georgii Clooney non de rebus historicis narrat sed de coniuratione adversus peritissimum addictum nuntiis vulgandis instrumentis communicationis, Stephanum Meyers (Ryan Gosling), in suffragiorum certamine pro candidato democratico Mick Morris (Georgius Clooney) rectore rei publicae Pennsylvaniae qui petit ut eligatur Civitatum Foederatarum Americae Praesidens, certans cum rectore Rei publicae Arkansasianae Ted Pullman: uterque nititur ut senatoris democratici Franklin Thompson suffragationem habeat qui alterutrius electioni faveat. Stephanus, telephonice arcessitus, clam cum adversarii fautore convenit se hortanti ut deficiat a grege sui petitoris ad candidatum Ted Pullman, addita etiam suspicione de candidati Mick Morris probitate. Reiecta proditione, affirmata fide, primum nihil de concursu a Stephano refertur suffragiorum certaminum principi Paulo Zara. Mox intellegit se in in insidias artis politicae incidisse. Cognito occursu cum homine factionis adversariae, princeps ei munus adimit, postquam edocuit diurnarium, qui minis Stephanum cogere velit ut clandestinum amorem ab ipso cognitum candidati erga puellam operis sociam aperiat. Sed ea, timens ne res patefiat, sibi mortem consciscit. Stephanus, spe ac fide destitutus, usus magna calliditate candidato confirmat sibi quiddam scriptum esse a puella ante obitum; eodem tempore ei suadet ut promittat se Adiutorem Praesidentis electurum esse quendam corruptum virum ditiorem pro auxilio senatoris Franklin Thompson in primis comitiis. Tandem factus est dux suffragiorum certaminis, dimisso Paulo Zara.

Georgii Clooney spectaculi excellenti regimine nobis in simulatae honestatis speciem et ostentationem artis politicae omnium temporum et locorum inire licet; histrio qui agit primas partes, Ryan Gosling, ore minime commoto, dissimulans sensus et cogitationes, optime rei politicae perfidiam pingere videtur.

DE IDIBUS MARTIIS (THE IDES OF MARCH)

USA 2011

GENUS: TRAGICUM

EXPOSITOR SCAENARUM: GEORGIUS CLOONEY

SCRIPTORES SCAENARUM: GEORGIUS CLOONEY, GRANT HESLOV, BRIAN OLIVER

HISTRIONES MAXIMI MOMENTI: RYAN GOSLING, GEORGIUS CLOONEY

Scripsit Lydia Ariminensis



Retro ad:

Novissima editio
Summum paginae