Annus
2 0 1 2


Virum Thailandianum in tecto domestico coluisse tigrides neglectas

d.10. m.Sept. a.2012, h.16:59

Res Bangcoco in capite Thailandiae facta

Virum Thailandianum in tecto domestico coluisse tigrides neglectas

Ecce duas ex sex tigridibus caveae artae et ferruginosae inclusis

Quae erant male nutritae et vix se potuerunt movere: Quidam vir Thailandianus 28 (duodetriginta) annos natus duos iuvenes et quattuor adultas tigrides in tecto aedificii caveae ferruginosae artissimae inclusit. Nunc ab astynomis comprehensis est. Verisimile est eundem virum voluisse tigrides vendere mercatoribus Vietnamensibus.

Bangcoco ex urbe – Se voluisse condere hortum zoologicum Surasak Bunthienthong vir 28 annos natus Thailandianus dixit astyphylacibus, cum comprehenderetur. In tecto enim aedificii locis industrialibus Bagcocensibus insiti coluerat sex tigrides caveae inclusas. At quidam investigator astynomicus opinatur virum has bestias voluisse vendere Vietnamensibus, qui tigridum pelles et carnem et organa valdê cupiant.

Thailandia est una ex iis terris paucis, ubi adhuc tigrides liberê vivant in naturâ rerum. In Thailandia dicitur florere mercatura illegitima specierum bestiarum, quae lege protegendae sunt. Mense Februario astyphylaces vi ceperunt domicilium Bangcociense, in quo operarii modo dissecabant tigridem necatam.

Ceteri aedificii conductores, in cuius tecto tigrides erant inclusi, non videntur curasse miros suos cohabitatores. Locutor astynomicus: „Inquilini praecipuê sunt operarii, quorum non videtur interesse problematum oecologiae."

Hanc relationem d.10.m.Sept., a.2012 in Germanico periodico interretiali, c.t. est „spiegel online" editam e Theodisco sermone in Latinum convertit Nicolaus Groß praeceptor Sedis interretialis domûsque editoriae, quae appellatur LEO LATINUS: http://www.leolatinus.com/

Titulus originalis: „Thailänder hält verwahrloste Tiger auf einem Hausdach".

Scripsit Nicolaus Gross



Retro ad:

Novissima editio
Summum paginae