MIGRANTES A FRANCOGALLIA REPULSI SUNT

Ante quadriduum CCC circiter migrantes apud finem Francogalliae, Vintimiliae, in regione Liguria, repulsi sunt cum advenae sine tessera identitatis teste essent; Administer Italicus negotiis externis praepositus Angelinus Alfano auctoritates Fracogallicas accusavit quod non foedus apud oppidum Schengen pactum observavissent quo cives et advenae in Europae nationes pactioni faventes libere commeare possunt. Sed collega Francogalliae negavit: non omnes accipiendos esse, sed tantum exules persecutione vexatos; rem ad Italiam spectare. Etiam ab Helvetia qui clam advenerunt paulatim iterum in Italiam mittuntur: spatio quinquemestri MDCC amoti sunt.

Custodes publici Italici nuper Vintimiliae vi amoverunt migrantes quamquam obstantes; pars apud mare supra scopulos manet cum confidat se extra Italiae fines egredi ut propinquos consequatur; non desunt qui occulte hoc bene gerant.

Res tragica et maximi momenti est, cum cotidie ingens numerus omni spe deiectorum ex Africa ad litora Siciliae et Italiae Meridionalis appellit, quorum pars ad alias Europae nationes profectura est. Dum hoc fit, Luxemburgi concilium habitum est ab omnibus administris exteris rebus praepositis: ex pacto, ut videtur, migrantium numerum ratum suum quaeque natio acceptura est. Praeterea Italia petiit ut lex Dublini abrogaretur qua postulatio asyli tantum rei publicae adventus inspicienda est. Sed nuntii incerti videntur: adhuc omnes nationes Europaeae in litora Italica per mare incolumes collectos exponunt.

Scripsit Lydia Ariminensis