Abhinc LXX annos primus pyrobolus nuclearis Hiroshimam delevit

Die VI mensis Augusti anno MCMXLV primus pyrobolus nuclearis in Hiroshimam coniectus est. In puncto temporis tam brevi quod effingi mente non possit post diruptionem calor decies ardentior quam summus sol factus est: multa hominum milia in cinerem versi sunt vel nullo vestigio relicto exstincti. In aedificiis etiam parvae partes e chalybe liquefactae sunt. Deinde impulsus vis supervenit. Post pauca temporis puncta LXXX milia incolarum occisi erant, sed insequentibus annis ob radiationem atomicam in summa bis centena milia numerati sunt.

Tres pyrobolarii illo die caelum pervolitaverunt supra Hiroshimam quorum unus (Enola Gay) pyrobolum iactavit; secundus instrumenta ad analysim et eventus mensuras servavit; tertius ad impressionem pelliculae cinematographicae paratus. Quid aëronavium gubernatores animo senserunt cum ab alto novissimum ruinae spectaculum et immanem pulveris nubem instar fungi conspexerunt? Milites imperata fecerunt, sed homines haud dubie ob tanta deleta vehementer commoti sunt. “Deus, quidnam fecimus!” - aëronavis Enola Gay gubernator Thomas Ferebee clamavit. Ut ipse ait “Urbs magnum ahenum catrani ferventis plenum videbatur ; solis lux , cum in terram descendisset, ob fumum et pulverem irradiantem desiit apparere”. Etiam pyrobolarii volantes VIII milia metrorum in altitudinem impulsus vi quassi sunt. Omnes gubernatores cum domum redissent, fortissimi viri aperte declarati sunt, sed animi conscientia usque ad mortem nonnullos excruciavit.

Scripsit Lydia Ariminensis