Sedes legationis Americanae iterum in capite Cubano aperta est

“USA et Cuba in vinculis praeteritae historiae non iam sunt, Baracus Obama et Raulus Castro forti animo apta consilia ceperunt”, ait antea Hispane, deinde Anglice Secretarius Civitatum Unitarum Iohannes Kerry in urbe capite Cubae La Habana, cum iterum domus legationis Americanae post LIV annos aperta esset. “Valla defensionis amovenda sunt, nunc nostrae nationes non hostiles inter se iam sunt, sed finitimae”, his fere verbis ille declaravit, Summo Pontifici Francisco publicis necessitudinis rationibus faventi maximas gratias agens. Tandem vexillum stellatum cum lineis in terra Cubana coepit vento iactari. Id tres veterani manuballistarii classici sustulerunt qui anno MCMLXI idem vexillum subduxerunt.

In oratione etiam de legibus et democratia actum est: futura in Cubae civibus sunt, Civitates Unitae se interponere nolunt; simulque reipublicae Cubanae instabunt ut iura hominum observentur; hoc itinere confecto, interclusio commercii intermitti poterit. Interea Fidelis Castro ab Americanis complures dollariorum miliones pro solutione compensativa petivit.

Scripsit Lydia Ariminensis