Annus
2 0 1 5


CREPITUS ARMORUM IN TRAMINE

CREPITUS ARMORUM IN TRAMINE

Priore die Veneris quidam Maurus viginti sex annorum (Ayoub El Qahzzani) in tramine celerrimo Lutetiam petenti, Amstelodamo profecto, a tribus civibus Civitatum Americae Unitarum, quorum duo milites, quartoque Britannico retentus est stragem incepturus. Unus Americanus graviter (Spencer Stone), alter (Alek Skarlatos) leviter vulneratus est; tertius adulescens scholasticus (Anthony Sadler)et civis Britannicus (Chris Norman) incolumes evaserunt. Fortissimi viri vectorum caedem vitare potuerunt, postquam quidam capsam globulorum in polybolum Russicum (Kalashnikov) insertam esse audivisset. Tromocrata arma displodens statim ab iis comprehensus est quos Administer Francogallicus exteris negotiis praepositus pro magna virtute praebita collaudavit; etiam Praeses Baracus Obama ferventer suis civibus laudem tribuit.

Dubium non est quin incursus tromocraticus temptatus sit; nam petitor, qui Atrebati (Arras) in vincula coniectus est, non ignotus auctoritatibus exstitit, cum iunctus gregi Jihadistarum in oppido Belgico Viroviaco (Verviers) invento reputaretur.

Scripsit Lydia Ariminensis



Retro ad:

Novissima editio
Summum paginae