Annus
2 0 1 5


NOVUM ITER BALCANICUM MIGRANTIUM

NOVUM ITER BALCANICUM MIGRANTIUM

Non solum mare Mediterraneum (Nostrum dicebatur a Romanis, Alienum aptiore nomine hodierno tempore appellaretur), sed etiam paeninsulae Balcanicae terras hodie turmae migrantes percurrunt. His diebus multa milia miserorum quorum magnus numerus ex Syria fugitivi, Aquincum, (Budapestinum) in Hungariae caput tramine ferriviario pervenerunt. Die Martis auctoritates Hungarae constituerunt ut statio ferriviaria intercluderetur ne tramina migrantibus conferta proficiscerentur. Post meridiem biocolytae gasium lacrimatorium diffuderunt ut concursum dissiparent. Nunc ante stationem reclamantes tesseras itineris et syngraphos ostendunt: se velle in Germaniam proficisci. Simul tria milia et quingenti milites ad fines Serviae, unde magna populi multitudo ingreditur, missi sunt custodes publicos adiuturi. Qui in Hungariam pervenerunt, Turciam, mare Aegaeum, Graeciam, Macedoniam, Serviam transierant: in Hungariam ingressus bene processit, quamvis mense Augusti apud finem ad meridiem spectantem murus exstructus esset qui CLXXV kiliometra in longitudinem patet.

Post meridiem eiusdem diei administer exteris negotiis praepositus Petrus Szijjarto nuntiavit se velle omnes censere asylum petentes ut, si iis ius sint, accipiantur; ceteri, ob inopiam patria profugi, repellentur. Germaniam et Unionem Europaeam reprehendit quod partes omni nationi recipiendae migrantium adventum foverent. Multa milia interea Vindobonam et in Germaniam advenerunt: num quoqumque exules Syri recipientur? Foedus Dublini nondum abrogatum est, ex cuius lege primae rei publicae quo inierint migrantes censendi sunt.

Breviter sumptum a Corriere.it.

Scripsit Lydia Ariminensis



Retro ad:

Novissima editio
Summum paginae