Annus
2 0 1 5


DE NOVO PONTIFICIS ITINERE

DE NOVO PONTIFICIS ITINERE

Ante triduum Summus Pontifex Franciscus apostolatus iter incepit in Civitates Americae Unitas profecturus, sed antea in urbem Cubae caput Sanctum Christophorum Habanae aëronavi egressus, hic constitit, quo vespere diei Saturni pervenerat: in aëriportu a Praesidente Raulus Castro hospitaliter acceptus est; ut liberator etiam ab iis qui se esse Christianos non profitentur salutatus. Nemo ignorat omni ope eum nixum esse ut iterum domos legationis Vasingtoniae et Habanae aperirentur. Post aliquot dies Pontifex a Senatu Civitatum Unitarum petet ut commercii interclusio quinquaginta annorum finem habeat.

Die Solis Papa Franciscus coram amplius quinquies centenis milibus Christifidelium in Foro quod a Rebus Novis nominatum est, Missam celebravit: ut ait inter alia “Vita vera in officio in re pro ceteris posita est: non ideologiis sed hominibus a nobis serviendum est. Servire est imbecillos curare. Excellentia rerum publicarum ab officiis erga debiliores aestimatur”. Acri chiasmo usus “Qui non vivit ut serviat – inquit – non servit ut vivat”. Missa facta, Pontifex, in Angeli prece, pacem pro Columbia invocavit; deinde eius domi priorem Praesidem Fidelem Castro, post meridiem, in Palatio Rebus Novis dicato, fratrem Raulum convenit.

Hesterno die Papa Franciscus Missam in urbe Holguin, secunda quod attinet ad frequentiam, celebravit, hodie Sancti Iacobi manet. Interea magna sollicitudo in Civitatibus Unitis serpit et increscit: timor est ne tromocratae indutis vestimentis biocolytarum Papae insidias moliri possint.

Scripsit Lydia Ariminensis



Retro ad:

Novissima editio
Summum paginae