Annus
2 0 1 5


LITUS CAERULAEUM IN FRANCOGALLIA INUNDATUM EST

LITUS CAERULAEUM IN FRANCOGALLIA INUNDATUM EST

XXI viri et feminae perierunt ob eluviones, quae magnos imbres subsecutae sunt in Litore Caerulaeo, Nicaeam, Canuam, Antipolim vastantes. Ex mortuis unus Italicus, alia Britanna, alia Lusitana sunt. Biduo tantum pluit, quantum toto mense Octobri solet, id est decima totius anni pars pluviarum effusa est . Vespere priore die Saturni usque ad multam noctem pluviae violentissimae cum ventorum turbine territorium prostraverunt: Flumen Luteum (Brague) exundans ab Alpibus Maritimis ad mare descendit: in oppidis nonnullae viae aquis mersae sunt, ex quibus Niceae etiam celeberrima Ambulatio Anglorum (Promenade des Anglais). Multa milia domorum statim vi electrica caruerunt, ac rete ferriviarium compluribus locis interruptum est. Quinque tramina Lordo profecta, peregrinatoribus cum multis aegrotis vectis, ob loca inundata commorata sunt; nuper viatores in Italiam redierunt vel mox redituri sunt.

Magna difficultate auxilia feruntur cum nonnulli vici remoti adhuc sine vi electrica maneant; cives urbani domos inundatas purgant atque a luto subtrahunt servantque necessaria quam possunt. Magna pars foris in dormitoriis ad rem paratis cubuit. Non defuit vilis scelestorum, lucratio quorum nonnulli comprehensi sunt. Praeses Hollande intra trimestre spatium detrimenta resartum iri publice promisit, cum calamitas naturae inopinate fieret. Sunt tamen, qui putent non maximum periculum statim indictum esse.

Scripsit Lydia Ariminensis



Retro ad:

Novissima editio
Summum paginae