Annus
2 0 1 5


QUOTA HORA EST IN TURCIA?

QUOTA HORA EST IN TURCIA?

Hora praesidis Erdogan est, qui reditum ad horam solarem distulit: quod fiet post comitia maximi momenti postero mense Novembri habenda. Quo modo hoc ei in suffragiis proderit ? Suffragatoribus longior dies erit ad sententias ferendas. Utique hesterno die omnes Turcae in instrumentis communicationis quota hora esset exquirebant. “Tandem Turcae universi concordes sunt saltem de hora roganda”, quidam in pagina breviloquenti (Twitter) iocose scripsit. Nam horologia computatri et sophophoni quamvis aliter Erdogan decrevisset, suapte machinatione horam a legitima ad solarem mutaverunt.

Nihil novum sub Turciae sole: iam pridem ante facta praecipua auctoritates differre horae mutationem constituerunt. Sed tunc nondum sophophoni effusi erant. Ut magna perturbatio de temporis computatione vitaretur, horum instrumentorum fabricatores utentes hortati sunt ut accomodationem automaticam auferrent et horam manibus mutarent: ad antiquam rationem redeatur!

Scripsit Lydia Ariminensis



Retro ad:

Novissima editio
Summum paginae