De regionum arcticarum contaminatione

Studiosi Universitatis Saskatchewan, urbis Canadensis, collegerunt larum quendam arcticum, cuius nomen Linnaeanum est "Pagophila eburnea", hydrargyrio quinquagies abundantiore quam ultimis annis saeculi undevicesimi pollutum esse: hoc compertum est comparando pinnas avium in Musaeo Arctico Canadensi et in Musaeo Groenlandiae Occidentalis servatarum cum hodiernis. Hydrargyrium, ex combusto carbone et montibus ignivomis dispersum, ventis ab longinquis locis usque ad regiones arcticas transvehitur. Quae contaminatio afficere putatur larorum fecunditatem ac procreationem, itemque accidere potest ceteris avibus necnon piscibus mammalibusque. Numerus horum larorum hodie quinta pars factus esse existimatur quam XXX annis ante.

Similia studiosi verentur, ne aliis marinis mammalibus idem eveniat.

Scripsit Herimannus Novocomensis