Manipulus Germanicus - id est Heike Kemmer, Nadine Capellnmann et Isabell Werth quarum equis Bonaparte, Elvis Va et Satchmo appellabantur - vicit certamen elegantis equitationis, Batavos et Danos superans.

Mongolus Tuvshinbayar Naidan, luctator Japonicorum more classis centum chiliogrammaton, Kazakum Askhat Zhitkeyev supremo certamine superavit: luctationem gigantum admirati sunt spectatores.

Optima sagittaria fuit Sinensis Zhang Juan Juan, adversarias Austrocoreanas Park Sung-hyun et Yun Ok-hee devincens.

Vestigia sequens magistri sui, qui ante XXV annos nomisma aureum sibi comparaverat, Andrea Minguzzi Italicus Zoltan Fodor Pannonicum humum deiciens optimus fuit luctator Graecorum more classis LXXXIV chiliogrammaton. Suetus Ara Abrahamian nomisma aëneum sibi tributum violenter abiecit, se iniuste victum reputans.

Scripsit Herimannus Novocomensis