Per paludes vagabatur bestia alata...

Palaeontologi Britanni reppererunt in Brasilia relicta ossium maximi adhuc inventi dinosauri volantis. Quod reptile ante 115 miliones annorum vivens nuncupatum est a scientistis Lacusovagus, creditur enim per lacus paludesve libenter ambulasse praedam quaerens, sicut ambulant hodiernae aves limicolae, ut exempli gratia ardea, licet hac avi aliquot maior esset lacusovagus noster aetatis cretaceae, longitudine alarum 5,5 metrorum.

Lacusovagus - monstratus hic supra in pictura sui repertoris, Mark Witton Universitatis Studiorum urbis Portsmouth - optime per aerem volasse putatur. Pertineat ille ad familiam Chaoyangopteridarum, nam ad urbem Sinensem Chaoyang prima huius generis dinosaurorum alatorum relicta inventa erant. Qui lacusovagi Sinenses tamen altitudine maxima essent 60 centimetrorum, multo ergo minores consanguineo suo nunc in oropedio Brasiliano Araripe reperto.

Scripsit ANL