Annus
2 0 0 7



De episcopo Polono,

De episcopo Polono, qui munere se abdicavit

Nondum coeperant die Dominico Varsoviae sollemnia, quibus archiepiscopi dignitatem dominus Stanislaus Wielgus (quem in imagine aspicis) ad pontificis voluntatem initurus erat, cum sella summa Polonae ecclesiae ipse sua sponte renuntiavit. Perturbata est multitudo, quae ad aedem cathedralem Varsoviensem ad novum archiepiscopum celebrandum convenerat: alii "mane nobiscum!" exclamabant, alii libenter abdicationis nuntium acceperunt. Sic optionem suam explicavit dolens fidelium catervis, qui eum obstupescentes interrogare pergebant: "Postquam diu condicionem meam consideravi, munus Varsoviae archiepiscopi in manus Sancti Patris restituo."

Stanislaus Wielgus, cum discipulus universitatis philosophiae studebat, cum emissariis occultis regiminis communistici, qui tum rem publicam Poloniae dominabatur, operam dedit: etsi accusationes diu reiecerat, postquam archiepiscopi officium sibi mandandum esse certior factus est, se cum delatoribus consuetudinem habuisse concessit. Nonnulla scripta enim iam comperta erant, unde accusationes illae comprobari poterant.

Josephus Glemp, qui usque ad hunc diem ut Varsoviae archiepiscopi munere functus est, homilia habita vehementissime accusationes ut "inhumanas" reprehendit: "Quale iudicium est illud - inquit - quo neque testimonia neque patrocinium neque documentorum comprobatio fuerunt?". Idem Josephus Glemp ad tempus officio illo fungetur.

Scripsit Herimannus Novocomensis



Retro ad:

Novissima editio
Summum paginae