De futuro Sarkozy regimine

Postquam adversariam suam Mariam Ségolène Royal profligavit, de novo regimine creando cogitat Nicolaus Sarkozy, praesidens rei publicae Francogallicae. Sine ullo dubio sella quaedam magni momenti Rachidae Dati praebebitur, XLI annos natae, futuri praesidentis nuntius: cuius pater ex Marochio, mater ex Algeria in Galliam migraverunt. Quindecim ministri mense Iunio creandi esse putantur, quorum septem mulieres. Minister primarius Franciscus Fillon fore narratur, quem cives Francogallici ob renovata seniorum stipendia iam cognoverunt.

Etiam Johannes Ludovicus Borloo, clarus praefectus labori addictus, Claudius Guéant, qui diu cum praesidente nuper electo assidue operam dedit, et Michaëla Alliot Marie, quae nunc rebus militaribus ut ministra praeest, ad sellas regiminis occupandas vocatum iri putantur.

Scripsit Herimannus Novocomensis