Annus
2 0 0 7



SPIEGEL ONLINE - 28

IAPONIA

Ministrum mortem sibi conscivisse

Toshikatsu Matsuoka Iapon minister agriculturae ipse mortem sibi conscivit. Hodie futurum fuisset, ut idem Matsuoka compluribus scandalis pecuniariis involutus in parlamento interrogaretur.

Berolino ex urbeMatsuoka minister 62 annos natus die Lunae in habitaculo doműs delegatorum Tochiensi animo relictus inventus in nosocomium erat illatus. Ibidem vulneribus obiit. Astynomi mortem Matsuokae affirmaverunt. Idem dicitur conatus esse se ipsum laqueo suspendere.


Matsuoka Iapon minister agriculturae: Qui 62 annos natus in nosocomio vulneribus obiit.

Matsuoka compluribus scandalis pecuniariis erat involutus. Idem praeter alia dicitur pro graphęo suo ex officio indicasse sumptűs maiores, quamvis graphęum reverâ a sumptibus *enoecii esset immune. Qui minister negaverat se quid deliquisse. Iapones mediatrales nuntiant post meridiem futurum fuisse, ut Matsuoka coram commissione parlamenti deberet de hac re referret. Iam antea palam postulatum erat, ut idem munere se abdicaret.

Matsuoka iam tribus diebus post munus susceptum publicę se excusaverat, quod non indicaverat stipem unius milionis yenorum (i.e. sex milium sescentorum euronum), quae data erat a quodam grege dubio. Compluribus scandalis gubernii factis Shinzo Abe(us) praeses ministerialis civibus ingratior est quam fuit umquam antea, ex quo anno proximo praeterito munus suum suscepit. Ex duabus opinionum perscrutationibus die Lunae mandatu actorum diurnorum „Mainichi" et „Nikkei" publicatis apparet portionem gubernii comprobandi mense Aprili deminutam esse 10% (denis partibus centesimis). Antea innotuerat gubernium amisisse numeros, quibus indicaretur, miliones civium Iaponiae quantum pecuniae collocassent in aerario redituum**.

Post duos menses in Iaponiâ fient electiones ordinis superioris, e quibus putatur apparere, qualis sit affectus animorum quoad Shinzonem Abeum praesidem ministerialem. Quidam gubernii vicarius dixit suicidio effectum iri nonnullas mutationes politicas.

*enoecium,-î n. – Angl. house rent; Theod. Hausmiete.
**aerârium redituum – Angl. pension (retirement, superannuation) fund; Theod. Renten/Pensionskasse.

Hanc relationem d.28.m.Maii a.2007 h.07.51 in periodico interretiali „Spiegel online" editam e Theodisco sermone in Latinum convertit Nicolaus Groß praeceptor Sedis interretialis doműsque editoriae, quae appellatur LEO LATINUS: http://www.leolatinus.com/

Scripsit Nicolaus Gross



Retro ad:

Novissima editio
Summum paginae