De typhone vehementissimo

Typhon "Dean" appellatus (cuius imaginam de caelo aspicere potes), litoribus Haitiae, Martinicae et Rei Publicae Dominicanae tactis, die Solis iter celeriter facit Jamaicam versus, ubi omnes aërinavium volatus interdicti sunt ac vetitum est, ne quisquam domo exire audeat. Iam orae Mexici et Insularum Cayman ab incolis desertae sunt; verentur interea auctoritates USAe ut fines Texani turbine perturbentur, ideo omnes hortatae sunt, ut a litoreis zonis aufugiant. Nam quintum gradum roboris attigisse putatur typhon Dean.

Turbinum studiosi alluvies immanes in Jamaica fore praenuntiaverunt, si pari cum violentia insulam illam percusserit: milites et astyphylaces omnes, etsi munere suo perfecto, ad auxilia ferenda et laborantibus succurrendum revocati sunt. Multitudines mane sibi commeatum et benzinum comparatum se contulerunt.

Etiam alibi exspectatur typhon: quindecim aëronaves praeter habitum ex Insulis Cayman ad Floridam effugientes transduxerunt, Cubae millia hominum ex regionibus orientalibus transvecti sunt. Damna et victimae iam nunc (16.00 hora Greenwichiana Solis die) numerantur: Sancti Dominici puer fluctibus submersus in aequore obiit, Martinicae mulier cordis ictu periit et vir ruinis interfectus est, Dominicae luto affluente mulier cum filiolo suo interiit itemque agricola, dum vaccam suam retinere conatur.

Saepius et vehementius typhones usquequaque percutere censent caeli studiosi.

Scripsit Herimannus Novocomensis