Annus
2 0 0 7



Benazir Bhutto ab islamistis occisa est

PAKISTANIA IN TUMULTU POST ASSASSINATUM BHUTTO

Al-Qaeda ream ictus se fatetur

Manus tromocratica fundamentalistarum islamicorum Al-Qaeda confessa est die Veneris se ream esse praeteriti diei assassinatus in urbe Islamabad ministrae quondam primariae Pakistaniae necnon ductricis principalis factionis partis adversae, Benazir Bhutto. Secundum nuntios, qui creduntur oriri ex orbe speculatorum US-Americanorum, ictum bombiferum suicidalem contra Bhutto, quo etiam alii circiter viginti homines vitam amiserunt, perfici iussit vicarius ducis gregis Al-Qaedanae Osamae bin Laden, Aiman al-Zawahiri.

Vita Benazir Bhutto, quae artioribus iunctionibus Pakistaniae cum USA favebat, a fundamentalistis islamicis petebatur a tempore reditus ipsius ex exsilio. In assassinatu bombifero diei 18 mensis Septembris peracto, cum ipsi Bhutto vitam servare contingeret, occisi sunt plus quam 130 homines, qui eam, ex aeriportu in urbem Karachi venientem sollemniter laudare cupiebant.

Nuntiis de morte Bhutto divulgatis, multi fautores eius in vias urbium principalium Pakistaniae advenerunt, ut publice terrori islamistarum reclamitarent. In pugnis interfactionalibus, quae unde orti sunt, iam plus quam quindecim homines se invicem occidisse nuntiantur, vitam amisit etiam unus vigil publicus.

Regimen fidus praesidenti terrae Pervez Musharraf decrevit comitia parlementaria nihilominus tempore constituto, id est 8 Ianuarii, esse habenda. Tamen ductor alterius principalis factionis partis oppositae, Ligae Musulmanorum Pakistaniae, et aemulus ipsius Bhutto, quondam minister primarius Nawaz Sharif, annuntiavit se suos candidatos e suffragando rebus ita stantibus reducturum et ad populum appellavit, ut operistitio generali se adiungerent.

 

Scripsit Stanislaus Tekieli



Retro ad:

Novissima editio
Summum paginae