Non omnes pauperiores fimus

Ultimis nonnullis mensibus tumultu magno fora mundana laborabant prae crisi hypothecarum Americanarum, quae hypothecae magis magisque insolubiles aestimantur. Omnes fere magni negotiatores damna hoc tempore reportaverunt, praeter hos, qui pecuniam collacabant in foris huic crisi mirum in modum resistentibus.

Haec sint subsidia collocatoria (Anglice investment funds) maxime lucrativa ultimorum trium mensium, secundum agenturam rei oeconomicae investigandae Morningstar; quae subsidia scilicet pecuniam collacant in: Sinis (lucrum trimestre 34,99%); Sinis Maioribus, i.e. Sinis cum Hongkongia, Formosa et Singapura (24,34%); Hongkongia ipsa (23,47%); India (17,09%); metallis pretiosis, per totum orbem terrarum (16,03%); terris Asiatic necnon regionis Pacifici praeter Iaponiam (14,89%); "mercatibus crescentibus", per totum mundum (13,20%); bonis terrae, i.e. metallis & frugibus (12,33%); Corea Meridionali (11,96%) necnon parvis et mediis negotiationibus Formosae, i.e. insulae Taiwan (11,59%).

Minime mirandum est primum locum teneri a Sinis, nam haec terra -officialiter adhuc communistica, oeconomice tamen magis magisque capitalismi puri plena - nondum foris globalibus artius iungatur, nec eorum "morbis" facile contaminatur. Lucrativae quoque se nuper praebuerunt vicini Sinarum, sive ipsi Seres (Hongkongienses, Formosani) sive alii (Coreani). Bonus effectus Indiae, sit ea quoque vicina Sinis, non tam "causa Serica" explanatur, quam ipso Indorum ingenio - nempe haec terra altera maxima vis oeconomica Asiae fit.

Ultimo die Saturni agenturae Standard & Poor's et Bloombergiana publicaverunt indicem maxime lucrativarum bursarum mundi ultimi quinquenni, scilicet temporis post cladem fororum Wallstreetianorum ictum terroristicum 11 Septembris 2001 sequentem; index S&P 500 bursae Neoeboracensi NYSE a tempore huius cladis bis tantum crevit. Quae fora maxime lucrativa sint (in parenthesi datur summa intermedia lucri annualis): Lima Gen. Peruviae (87,5%); PFTS Ucrainae (83,7%); Sofix Bulgariae (77,1%); Bovespa Brasiliae (73,7%); Hermes Aegypti (65,6%); IGBC Gen. Columbiae (63,8%), Vilnius Lithuaniae (57,4%); OMX 15 Islandiae (56,5%); ISE 100 Turciae (54,6%) necnon BET Dacoromaniae (54,2%).

Desunt initio huius indicis Sinae, quae 46. demum locum tenent cum lucro annuali bursae Shanghaiensis (Shanghai Comp.) 32,6 centesimarum, nam ante duos tresve annos ambae bursae Sinenses - Shanghai et Shenzhen - maximis cladibus sine clara huius rei causa laborabant, licet oeconomia Sinarum celerrime tunc crescebat. India in supradicto indice duodecimum (12.) locum tenet, Russia vicesimum primum (21.).

Scripsit ANL