Annus
2 0 0 7


EGEL ONLINE - 22

TORTA IACTA

IN OETTINGERUM IACTAM ESSE
TORTAM CERASINAM SILVAE NIGRAE

Stutgardiā in urbe quaedam studentissa tortam coniecit in Oettingerum praesidem ministerialem Badeniae-Virtembergae. Eadem mulier iuvenis invecta est in hunc virum politicum partis Christiano-democraticae (CDU) orationem habentem. Quae est ab astyphylacibus comprehensa.

Stutgardiā ex urbe – Guntherus (Günther) Oettinger hodie locutus est in Domo oeconomiae Stutgardiensi. Iuvenis illa mulier consedebat in ordine sellarum primo, cum praeses ministerialis gratulabatur in iubilaeum decennale Societatis „ProArbeit", quae prodest commodo publico.


En victimam impetūs tortarii:
Guntherus Oettinger

 

Primis disquisitionibus inventum est mulierem 24 (viginti quattuor) annos natam primo fuisse prorsus non notabilem. At deinde eandem subito surrexisse, in suggestum versus pulpitum iisse, cistulam chartaceam aperuisse, tortam exemptam iaculatam esse in Oettingerum. Verisimile esse hanc placentam fuisse tortam cerasinam Silvae Nigrae.

Mulier statim cohibita et comprehensa est ab Oettingeri satellitibus. Astynomi rettulerunt praesidem ministerialem non esse violatum – exceptā synthesi eius vestium leviter maculatā nullum detrimentum esse factum.

Locutor astynomicus dixit usque nunc incertum esse, quare hoc facinus commissum esset. Mulierem recusare, ne rem explicaret. Rebus personalibus notatis eadem est dimissa. Locutor addidit nunc inquiri propter suspicionem corporis laesi et rei afflictae.

Hanc relationem d.22.m.Nov., h.18.10, a.2007 in Germanico periodico interretiali, c.t. est „spiegel online" editam e Theodisco sermone in Latinum convertit Nicolaus Groß praeceptor Sedis interretialis domūsque editoriae, quae appellatur LEO LATINUS: http://www.leolatinus.com/

Scripsit Nicolaus Gross



Retro ad:

Novissima editio
Summum paginae