Haec invênit Paulus Sereno palaeontologus Universitatis Chicagoensis ossibus Nigersauri perquisitis. Iam a.1999 Sereno ossa Nigersauri invenerat in desertis Saharanis. Nunc Nationalis Societas Geographica publicavit peculiaritates huius dinosauri anatomicas. Quae sunt extraordinariae: Necesse est Nigersauro fuisse ossa ferê pellucida. Tamen eius corpus decem metra longum continebatur sceleto levissimo. Godefridus (Jeffrey) Wilson, professor assistens Universitatis Michiganiensis: "Eius vertebrae dorsales" inquit „sunt chartae tenuitate - difficile mente fingitur, quomodo eadem pares fuerint laboribus cottidianis. At scimus labores vertebris bene sustentos esse".
Nigersaurus cum sit longitudine 10 tantum metrorum, plerisque dinosauris est minor. - quamvis idem est affinis Diplodoci dinosauri herbivori 25 metra longi, qui culmina arborum arrodebat. At proprietas Nigersauri fuit rostrum: eidem enim infixi erant quingenti dentes, qui erant novaculâ acriores. Sereno dicit omni mense novum dentem Nigersauri accrevisse. Imagine mandibulorum scandimento confectâ apparuerunt octo dentes novi, qui post dentes incisivos accreverant.
Dentaturâ mandibulisque angulatis rostrum Nigersauri quodammodo factum est herbisectrum. Praeter herbas resecandas huic dinosauro vix aliquid restabat faciendum, nam secundum Serenonem Nigersaurus propter ossium levitatem vix poterat caput altius levare quam dorsum.
______________________
*herbisectrum, -i n. [VOX LATINA 78,320; LEXICON AUXILIARE, 3.ed., p.444, s.v.]- Angl. lawn-mower; Theod. Rasenmäher.
Hanc relationem d.15.m.Nov., h.16.32, a.2007 in Germanico periodico interretiali, c.t. est „spiegel online" editam e Theodisco sermone in Latinum convertit Nicolaus Groß praeceptor Sedis interretialis domûsque editoriae, quae appellatur LEO LATINUS:
