CENTUM CLAVI (Centochiodi)

Italia anno MMVI, distribuit Mikado

Direxit et in scaenam reduxit: Herimannus Olmi, imagines curavit: Fabius Olmi, musicam curavit: Fabius Vacchi, cinema extruxit: Paulus Cottignola, partes maximi momenti egerunt: Raz Degan, Luna Bendandi, Amina Syed, Michael Zattara.

Herimannus Olmi, praeclarus pellicularum filmicarum auctor Italicus, iam aetate provectus postremam fabulam suam creavit: post quam se documenta tantum filmica confecturum praenuntiavit. Olmi catholicus artifex est, religionem pauperum et humilium praecipue operibus suis effingens; maxima opera a plerisque "Arbor lignearum solearum" (L'albero degli zoccoli), quo vita rustica piorum agricolarum narratur, et "Munus armorum" (Il mestiere delle armi), quo de militiis mercennariis agitur.

"Centum clavi" singulare ac saepe acre opus videtur: in Bononiensis universitatis bibliotheca centum clavis ferreis totidem magni pretii antiqui libri malleo conficti sunt, arcanum signum contemptae humanitatis. "Unum caffeae poculum quam cum amico bibas omnibus libris praestat". Narrat fabula de magistro quodam doctissimo, qui universitate ac dilectis studiis derelictis egentium modo vitam renovatam incipit in Padi fluminis ripa, naturae et amicitiae dona requirens: prodigo filio similis, hodierni temporis dissipationem effugit, patrem misericordem complexurus. Quis tamen pater ille? forsitam Deus, haud dubie conscientia sui.

Spectatoris visum magnum flumen dominatur, vitae societatisque sedes necnon humani cultus, quem paulatim aedificia et bitumen occupare pergunt. Fascinatio et gravitas Padi fluvii, parum periegetis cognitae, miris imaginibus demonstrantur. Item gaudet spectator obsoleta musica, cuius ad numerum et adolescentes et senes sub frondibus se movere soliti sunt.

Eheu! ultimum Herimanni Olmi cinema hoc est!

Scripsit Herimannus Novocomensis