"Litteras Spens et Rutgers ad Oxenstierna" in lucem datas

In lucem modo editae sunt "Litterae nobilissimi James Spens et Jan Rutgers (ad Axelem Oxenstierna)", quae multum prosunt ad rem diplomaticam Europae XVII saeculi intellegendam necnon exempla omnibus manebunt optimae Latinitatis.
Cum anno 1612 Axel Oxenstierna munere cancellarii Regni Suetici fungi coepit, Suetia erat civitas prope ad sui mortem spectans: ex oriente petita a Moscovia, e meridie a Polonia, ex occidente a Dania.
Cum anno 1654 Oxenstierna obiturus erat, Suetia erat una principalium potestatum Europae, tribus supradictis potentior, talemque mansura usque ad cladem Poltavianam copiis Sueticis ab imperatore Russorum Petro I anno 1709 inflictam.
Potestatem novam Suetiae Oxenstierna struebat non tam vim militarem augendo, quam arte diplomatica aulas regales per totam Europam scite adiens auxiliumque sibi interpellans. In munere hoc maximi momenti ei erant: praefectus militum Scotus nobilissimus James Spens necnon humanista Batavus et iuris peritus Jan Rutgers. Hic triumviratus praecipue bene meritus est introitum Suetiae in Bellum Triginta Annorum praeparando.
* "Litterae nobilissmi James Spens et Jan Rutgers (ad Axelem Oxenstierna)", in lucem cura Arne Joensson editae in serie: Collectanea opera epistulaeque Axelis Oxenstierna, tomus II:13, Holmiae 2007

Scripsit ANL