Annus
2 0 0 7


PROELIUM VARIANUM

Studentes Hammaburgenses reconstruere navem Romanorum bellicam

Scripsit Katarina Sass, in Latinum convertit Nicolaus Groß

Anno 9 p.Chr.n. in Silvâ Teutoburgensi saeviit proelium Varianum, in quo Arminius Romanis paravit cladem exitialem. In huius proelii anniversarium bismillesimum studentes Hammaburgenses reconstruunt navem Romanorum bellicam – etiam in nomine scientiarum.


Reconstructio navi originali fidelissima: Andreas Cruse studens stat in nave Romanorum bellicâ reconstructâ

In aëre officinae volitat scobis serratoria, oecus completur quiritatione serrarum catenatarum aliorumque instrumentorum stridulissimâ. Decuria ferê studentium et tironum Hammaburgensium caeruleis bracis pectoralibus* indutorum tractat ligneum truncum navigii. In navalibus, quae sita sunt in Hammaburgensi tribu Harburg, hôc tempore fit fidelissima reconstructio antiquae navis Romanorum bellicae. Reconstructores sperant recto tempore, id est sollemnitate anniversariâ bismillesimâ proelii in Silvâ Teutoburgensi facti, opus suum perfectum iri.

Anno 9 p.Chr.n. Arminius princeps Cheruscorum in proelio Variano compluribus legionibus Romanis, quarum fuerunt quindecim milia militum, cladem paravit exitiosissimam. Ita factum est, ut Romanorum studia regiones a dextris fluminis Rheni sitas in provinciam redigendi definitê in irritum caderent. Sub titulo q.e. "IMPERIUM – CONFLICTUS – MYTHUS – PROELIUM VARIANUM A.MMIX" anno secundo a proximo trans limites complurium terrarum foederalium in memoriam revocabuntur in vico Haltern ad lacum sito imperium Romanum, in vico Kalkriese conflictus, in oppido Detmold mythus Germaniae inexsuperabilis.

Christophorus Schäfer Universitatis Hammaburgensis historicus et incepti moderator explanat navem, quae reconstruatur secundum navem antiquam in Palatinatu Superiore (i.e. Oberpfalz) inventam, proximo vere futuro in aquam tractum iri. "Romani" Christophorus inquit „suâ aetate hôc genere navium ante proelium copias militum per Rhenum eiusque fluvios secundarios transportaverunt". Itaque a.2008 archaeologos navem reconstructam variis locis Rheni sistere velle, ut ibidem philotheoros (i.e. Angl. tourists) certiores facerent de rebus antiquis expositis.

At usque ad hoc tempus necesse erit, ut Hammaburgenses iuvenes navigii constructores maximê laborantes ita utantur malleis serrisque ut olim iisdem instrumentis usi sunt fabri Romani. Apparuerunt iam opera priora. Lignea compages costarum fundamentalis iam est perfecta, ut liceat suspicari, qualis futura sit forma navigii stupenda.

"Epigrôs (i.e. clavos ligneos) quoque nos ipsi fabricavimus"

Studentes Hammaburgenses sperant se, si hanc navem 16 metra longam et tria metra latam perfecissent, novas cognoscentias scientificas adepturos esse. Christophorus: „Inventionibus archaeologicis" inquit „scimus quidem aetate antiquâ fuisse tales naves bellicas, sed neque accuratê novimus munera neque capacitatem huius generis navium. Itaque se navigationibus probatoriis experiri velle, quae fuerit navigii velocitas summa, quam apta fuerit ad itinera marina facienda, quantum ponderis ferre potuerit; denique omnia de his rebus inventa publicatum iri.

"Nostrâ interest" Christophorus historicus inquit „cognoscere, tales naves bellicae quam aptae fuerint et quantum valuerint ad stratagema militare": Itaque se nullas materias adhibere ad navem reconstruendam nisi tales, quales iam aetate Romanâ in usu fuerint. „Navis integra constat e ligno querneo et lariceo, et ipsos epigros nos ipsi fabricavimus". Haec reconstructio navigii Romani cum esset prima, quae spectaret ad aetatem Augusteam, eandem multum conferre ad constructionem navalem primi saeculi p.Chr.n. cognoscendam.

Simul hôc incepto construendi iuvenes disoccupati novam spem concipiunt professionis futurae. Gerrit Wagner dux gregis: "In hac nave construendâ" inquit „triginta iuvenes ita instituentur, ut fiant constuctores navales. Cooperatio tironum et studentium optimê fit necnon iidem rationes operandi manuales tam bene sciunt, ut nulla sit penuria temporis." In summâ 14 (quattuordecim) studentes historiae horis suis subsicivis participes sunt navis construendae.

Tutores huius incepti facti sunt politici coryphaei, qui adlati sunt Angelae Merkel cancellariae foederalis (quae est partis Christiano-democraticae). Expositiones fient per quinque menses. Christophorus: "Iam nunc" inquit „nobis licet simus valdê contenti". Scilicet naves non fuisse participes proelii Variani. Verisimile enim est caedem Romanorum Germanorumque multiplicem per nonnullos dies factam esse in locis paludosis ad Silvam Teutoburgensem sitis.

Hanc relationem d.29.m.Nov. a.2007 in periodico interretiali „spiegel-online" inventam e Theodisco sermone in Latinum convertit Nicolaus Groß praeceptor Sedis interretialis domûsque editoriae, quae appellatur LEO LATINUS: http://www.leolatinus.com/

Scripsit Nicolaus Gross



Retro ad:

Novissima editio
Summum paginae