Annus
2 0 0 7


Quamquam erat vita eius miserrima,

IN LUCEM DANTUR EXTREMA SCRIPTA MALCOLM LOWRY

Iter sine fine

Quamquam erat vita eius miserrima, incredibiliter magna vi alcoholismi necnon demissione animae affecta, contigit ei ante mortem anno 1957 sua manu allatam duos libros conficere ac publicare, quorum unus, Sub vulcano, sine ullo dubio opus egregie factum est. Reliquit etiam nobis Malcolm Lowry permultam copiam scriptorum singulorum, fabellarum brevium et brevissimarum, epistularum ad amicos, carminorum, commentariorum annotationumque. Nunc haec omnia, a poeta, translatore et critico Michael Hofmann collata recensaque primum in lucem edita sunt.

Quorum, quasi magis privatorum auctoris scriptorum e lectura subito apparet Lowry omnino alter, quem adhuc scivimus: homo aliis gratissimus, placidus, licet pavor ac terror futurorum eventorum, ut ea conspicere solebat, etiam in his notiunculis bene servetur. In conaminibus eius extremarum fabularum, ut sunt numquam ad finem perductae La Mordida (Morsus) necnon Dark as the Grave Wherein My Friend Is Laid (Atrum ut sepulchrum, ubi amicus meus humatur) plane videmus auctorem iter proficiscentem ad loca ei omnino ignota, in hoc itinere inopinate invenientem adhuc ei ignotam formam scribendi, mixturam - si licet uti verbis Hofmannianis - "veri et falsi, confessionis et confusionis, elaborationum et sermonis liberi". Qui auctor singulares suas molestias in singularem artem narrandi insciens transmutavit, cuius rei testem nunc auscultare possumus.

Omnibus fautoribus libri Sub vulcano erit novus liber maximum at inexpectatum gaudium, novam quasi faciem scriptoris monstrans.

* Malcolm Lowry, The Voyage That Never Ends. Fictions, Poems, Fragments, Letters (Iter sine fine. Fabellae, Carmina, Fragmenta, Epistulae) . Opus recensum a Michael Hofmann. Domus editoria New York Review Books, 2007.

Scripsit Stanislaus Tekieli



Retro ad:

Novissima editio
Summum paginae