E (non semper) imo mari nuntiolae

62 caniculi marini, bestiae haec omnium in maribus viventium rapacissimae, 62 homines adorti sunt praeterito anno in toto orbe terrarum - nuntiant studiosi Universitatis Studiorum Civitatis Floridae. Quorum hominum-victimarum quattuor vitam amiserunt. Quod aliquantum minus est culmine historico anni 2000, cum in 79 incursionibus undecim homines in mari natantes diem supremum obierint.

Maxima pars incursionum - viginti sex - in oris civitatis Floridae evenerunt - docet George Burgess, rector societatis nomine International Shark Attack File notae.

Eventus anni 2007 tamen difficiliores erunt aestimando nam primum in memoria gentium habebimus casum incursionis... hominis in caniculum marinum! 15 enim die Februarii piscator Australiensis theutoidearum (quae animalia succum producunt, ex quo atramentum olim faciebatur, hodie tamen libenter sunt a hominibus manducata), caniculum longitudinis 1.3 metri (ergo non valde magnum) in aqua vadosa videns, nonnullis poculis aquae vitae cum amicis iam epotis, corpus suum de ponte in aquam iecit nudibusque palmis caniculum cepit! Qui piscis tamen vehementer repugnare coepit et mox agressor eum amisit. Sine vulnere ullo in oram revenit caementarius Philippus Kerkhof, bracae tamen eius Genuenses aliquantum dilacerati dentibus caniculi manent. Diurnariis deinde dixit: Credere vix possim, quae sit vis aquae vitae!

Classis autem militaris Americana nuntiat se delphinos necnon leones marinos condocefactos adhibituram esse ad naves suas a tromocratibus tuendas. Si ergo urinator gregis Al-Qaeda es et vis e mari pyrobolis navem Americanam in portu quodam adori, cave... fortasse non canem, sed delphinos et leones. Illi dominos suos de praesentia tui certiores facient, hi... etiam te ipsum in aqua apprehendere sciant! Iam triginta talia mammalia marina ad naves tuendas ab Americanis condocefacta sint.

Scripsit Nanompouphos