Annus
2 0 0 7


Jaka jest dzisiejsza data,

CRATER NUGARUM MENSIS DECEMBRIS

 

Asini maxime pretiosi

Asini fiunt maxime pretiosi et citius quam automobilia nunc emuntur in zona Gazae, abhinc Israhel sanctiones commerciales contra hanc regionem a factione Hamas ministratam introduxit, inter alia prohibens huc alimenta ignis et partes automobilium importari. Petroleum et partes curruum adhuc in Gaza emi possunt, sed tantum in "mercatu nigro", pretio scilicet ingenti, multi ergo malunt asino ad vel se vel onera vehenda uti. Sed etiam horum animalium pretia citissime crevere coeperunt, cum tantum huius generis iumenti cultores bonos sibi ventos flare sensissent - asinus, qui ante sanctiones mense Septembri introductas circiter 200 dollaribus Americanis stabat, nunc 420 saltem dollaribus venum it.

Non satis id difficultatum. Carior in dies fit pabulum asinorum. Hodie ut asinum in bona forma tenere cupis, quinque dollaribus escam ei cottidie praebere debes.

Quis est hodie dies? Ubi inveniam proximum mercatum instrumentorum? Quomodo ad ministrum primarium telephonare possum? - tales sunt rogationes civium comitatus Cambridgeshire, qui ad lineam telephonicam 999 telephonant, ubi vigiles publici telephonemata exspectant aut civium in summo periculo auxilium poscentium aut testium oculatorum de crimine quodam nuntiantium. Omnibus tamen rogantibus biocolytae urbaniter respondere debent.

Virum 65 annorum momordisse canem rabiosum in vico Pacaccadavu civitatis Indicae Kerala nuntiat ephemeris "Hindustan Times". Canis iam ab aliquo tempore rusticolas vexabat, cum tamen anatem supradicti viri arripuisset, hic finem vexationibus ponere decrevit, in canem irruit et cum nullum instrumentum sub manu ei adesset, dentibus bestiam necavit. Cum tamen postea repertum sit canem rabie aegrotasse, necator eius statim in nosocomium receptus est.

Ad crimina commitenda proniores pronioresque fiunt senes Iapones - patet ex investigatione ab actis diurnis "Tokyo Shimbun" peracta. Praterito enim decennio iudices ter tantum numerum reorum aetate 65 aut plurium annorum condemnaverunt quam decennio priore. Ex 45 milibus senium sceleratorum dimidia pars rei sunt furtorum in pantopoliis factorum. 1.700 tamen vetulorum ob alios cives pugnandum in ius vocati condemnatique sunt; horum criminum numerus decem tantum inter senes Iapones maior esse putatur priori decennio comparatus.

Quindecim annos post mortem laborem petitum accepisse virum Taurinensem nuntiant acta "La Stampa". Anno enim 1975 Antonio Giannitti, cum patria Neapoli Taurinium migravisset, libellum ad curatorurium Taurinense misit officium scholae ianitoris petens. Nullo ab iis responso accepto in alia quadam negotiatione laborem invenit, quo fungebatur usque ad mortem ob infarctum anno 1992. Nunc tamen, 32 annis post petitionem missam, curatorium scholarum responsionem Giannitti remisit, nuntians adesse iis vacuum munus ianitoris.

Scripsit Stanislaus Tekieli

Scripsit



Retro ad:

Novissima editio
Summum paginae