Bush denique clemens

Ultimo muneris sui die Georgius Bush, cui cras democraticus Baracus Obama successurus est, damnationes duorum militum qui apud fines Mexici excubias agebent cum mitioribus poenis commutavit: qui ad undecim et duodecim annorum captivitatem anno MMV damnati sunt, quia illicitorum pharmacorum mercatorem sclopetaverant. Ambo ergo mense Martio e custodia emittentur. Tam democratici quam republicani senatores praesidentis consilio assensi sunt. Cum praesidentis magistratum gereret, Georgius Bush centum et undenonaginta damnatis poenas remisit, undecim poenas commutavit; eodem temporis intervallo, duplicem numerum reorum Wilhelmus Clinton et Ronaldus Reagan similibus beneficiis affecerunt.

Posthac Georgius collegis suis telephonico apparatu salutem dixit: quem cum Vladimiro Putin et Gordone Brown collocutum esse rettulit nuntius Domus Albae.

Scripsit Herimannus Novocomensis