SALTEM 28 MANIFESTANTES NECATI SUNT GLANDIBUS BIOCOLYTARUM

Flamma reclamitationis ardet in Madagascaria

Saltem 28 cives Madagascarenses vitam amiserunt, cum biocolytae sclopetassent in greges hominum contra regimen manifestantium in viis media in urbe capitali, Antananarivo. Nihilominus, ductor oppositae partis, Andry Rajoelina, declarat mox novas manifestationes fieri, licet nunc pax regnare videatur in plateis Antananariviensibus.

34 annorum Rajoelina (photographemate monstratus), qui praeterita septimana abdicare coactus est munere burgimagistri Antananariviensis, est aemulus principalis praesidentis Madagascariae Marc Ravalomanana (aetate 59 annorum) in pugna de dominatione scaenae politicae huius terrae. Demissio coacta Rajoelina effecit, ut cives in viis manifestare inciperent. Tunc, die Saturni, a biocolytis armatis reclamitatores aedes praesidentiales petentes vi adorti sunt. 28 perierunt, pluribus quam ducentis vulneratis.

- Populus vult mutationem rerum - dixit diurnariis die Solis ductor reclamitantium, cum vulneratos in nosocomio invisere venit. - Quale est responsum regiminis? Sclopetatio ignivoma - addidit.

Nonnulla dena hominum sclopetatione necati erant in viis urbis capitalis Madagascariae iam mense Ianuario, cum primum populus contra praesidentem Ravalomanana reclamitare coepisset.

Madagascaria, quarta maxima insula in orbe terrarum, est locus amoenus libenter a viatoribus peregrinis frequentatus. Habet etiam haec civitas multa bona terrae, ut petroleum, aurum, cobaltium, nickelum uraniumque.

Scripsit Stanislaus Tekieli