CONGRESSUS CIVITATUM GREGIS SEPTENARII

Una recessioni repugnemus!

Maxime oeconomice evolutae terrae mundi - quae sint Civitates Unitae (USA), Iaponia, Germania, Britannia, Francogallia, Italia et Canada - decreverunt die Saturni Romae pugnam contra recessionem globalem iis fore abhinc munus principale. Grex septenarius - sive potius eius ministri rerum fiscalium praesidesque argentariarum centralium - eodem tempore decreverunt se inventuros novas regulas ad 'novum ordinem' oeconomicum mundi struendum. Qualis tamen hic ordo sit, parum liquet - minister oeconomiae fiscaliumque Italus, Giulio Tremonti, qui hospes erat congressus terrarum G7, de hac re nihil plus diurnariis dicere volebat. Sunt qui dicunt id expansionem G7 significare, nam multi iam clamant sine talibus potestatibus oeconomicis ut Sinae, India, Russia et Brasilia nullo modo de oeconomia mundana hodie disputari posse. Fieri ergo etiam posse, ut hic conventus G7 ultimus talis gregis erat et proximus iam ad gregem exempli gratia G11 spectabit.

Patricipantes conventus Romani una declaraverunt protectionismum statalem minime effecturum esse ad meliorem vitam oeconomicam uniuscuiusque terrae adipiscendam. Quod sine dubio responsum erat ad vocationes multorum civium US-Americanorum, qui regimen Barack Obama velint secundum principem "eme tantum merces Americanas!" agere. Condicionem "Eme merces Americanas!" continent subsidia fiscalia regiminis USA summa 787 miliardorum dolariorum oeconomiam aegrotantem adiuvare, quae modo Congressus USA aprobavit, licet ipsum regimen US-Americanum non magni momenti vero hanc clausulam hodie putet (ita saltem secretarius commercii Timothy Geithner, qui Romae aderat).

Aliter paricipantes sententiam expresserunt nummum Sinensem yuan adhuc non satis validem esse (scilicet magistratus Sinenses eum nimis adiuvare, ut exportatoribus Sinensibus yuan prosit). Neque bene ferant repraesentatores civitatum gregis septenarii maximam ultimis in mensibus volatilitatem nummi Iaponum yen.

Scripsit Stanislaus Tekieli