Delator Estonicus

Venditio Russis secretorum non disparuit, vallo Berolinensi diruto. Nam scriba quidam Estonicus, qui operam apud ministerium rei bellicae patriae suae dabat, duodecim annorum custodiae condemnatus est quod militaria secreta Russorum regimini pretio centum milium dollariorum vendidisset: cui secreta propterea nota erant, quod anno bismillesimo quarto Estonia socia NATOnis facta est.

Hermannus Simm, dux custodiae publicae Estonicae, ab anno MCMXCV putatur pro exploratoribus Russis egisse. Anno bismillesimo dux securitatis apud ministerium factus, multa occulta de NATOnis communicationibus et secreta vigilantia cognovit: tum cum duobus legatis agenturae SVR (olim KGB appellatae) ter quaterve in variis Europae urbibus convenit. Praesidens consilii securitati addicti senatus Estonici "Hermanno - inquit - gratum fuit ludo tam magno interesse: occulta diligere solebat." Praeter captivitatem viginti milionibus Estonicarum coronarum, id est duodecim centenis milibus euronum, multatus est.

Scripsit Herimannus Novocomensis