Annus
2 0 0 9


REPERTA EST IMAGO MULIEBRIS 35.

REPERTAM ESSE IMAGINEM MULIEBREM 35.000 ANNORUM

Vetustissima sculptura mundi?

Nuper reperta in spelunca Hohle Fels Sueviae Germanorum scupltura mulieris videtur esse vetustissimam nobis notam scalpturam manu hominis factam, nuntiat novissima editio actorum "Nature", auctore professore Nicholao Conard Universitatis Studiorum Tubingiensis. Ex ebore mammutheo factam imaginem mulieris, corpore valde rotundo, mammis natibusque copiosissimis, archaeologi putant esse aetatis saltem 35 milium annorum. Ita fiat haec longitudine 6 centimetrorum imago veterrima sculptura in toto orbe terrarum adhuc inventa.

Iam antea in hac spelunca Sueviana inventae sunt nonnullae sculpturae, imagines scilicet animalium atque res e lapide facta, quam ad 'crepundia adultorum' sive 'crepundia Venerea' pertinere putares.

'Venus' illa Sueviana inventa est in sex fragminibus, quorum primum reppererunt archaeologi mense Septembris proxime praeteriti anni. Adhuc caret imago manu laeva, studiosi tamen sperant se eam inventuros. Caret quoque sculptura capite, quod tamen secundum mentem sculptoris esse factum: loco enim capitis statuae adesset quasi anulus, ita ut pendendo ferri ut ornamentum possit.

Fortasse erat haec imago deae fertilitatis, putant archaeologi. Aetas eius est tam vetusta, ut vix aestimari possit methodo radiocarbonica. Studiosi tamen putant eam vetustiorem esse periodi Gravettianae, quae in Europa florebat inter 22 et 27 abhinc milia annorum. Cuius periodi clarissimam sculpturam esse Veneris Willendorfianae.

Scripsit ANL



Retro ad:

Novissima editio
Summum paginae