De luctu Philippinarum

Per decem dies lugebunt incolae Philippinarum Cor Aquino, quae prima mulier summum magistratum et in civitate illa et in tota Asia gessit: ipsa propter letalem morbum LXXVI annos nata pridie Kalandas Augustas acerbam mortem obiit. Cum Manilae populus feretrum colat flavos flores et candelas ardentes offerens, flavis taeniis usquequaque ostentatis communis luctus demonstratur. Funus praeclarae feminae Mercurii die privatim fiet.

Cor Aquino inopinate rei publicae studere coepit post necem viri sui Benigni Aquino, qui post septennem captivitatem cum dictatore Ferdinando Marcos de praesidentis munere competiturus erat. Vidua fidem populi sibi comparavit et anno MCMLXXXVI praesidens liberis comitiis facta est post diuturnam dictaturam, cum communistae armis capiendis parati essent; eodem anno pacis praemio Nobeliano exornata est (imago adposita temporibus illis impressa est). Complures inimicorum suorum coniurationes ut praesidens debellavit, legibus democraticis fidem servans et captivis politicis libertatem reddens. Recenter contra corruptionem et ambitus praesidentis Gloriae Arroyo nisa est. Et Philippinorum Gloria Arroyo et Civitatum Americae Unitarum praesidens Baracus Obama Cor Aquino laudaverunt; nuntius Baraci "Eius vis - inquit - et fortitudo omnium nostrum animos ad meliora concitant et optimas virtutes Philippini populi ostendunt."

Scripsit Herimannus Novocomensis