IBUNTNE DENUO AMERICANI IN CORNU AFRICAE?

Clinton monet actiones contra Erythraeam

In urbe capitali Keniana, Nairobi, sermonibus habitis cum praesidente Somaliae, Sheikh Sharif Sheikh Ahmed, secretaria regiminis (i.e. ministra rerum exterarum) Civitatum Unitarum Americae (USA), Hilaria Clinton, monuit actionem militarem suorum contra Erythraeam, nisi haec sinat vi adiuvare separatistas islamicos in vicina Somalia.

Erythraea officialiter negat se auxiliari gregem islamistarum al-Shabab, qui conantur expugnare regimen Somaliense (quoque islamisticum, licet fili liberalioris), US-Americani tamen has negationes veras esse minime credunt. Grex al-Shabab interim in dies crescere nuntiatur atque nunc habere circiter 250 milia armatorum militum.

"Sine dubio, si al-Shabab creant suam civitatem in Somalia, statim invitent illuc al-Qaedanos aliosque tromocratas, quod periculo esse possit etiam Civitatibus Unitis Americae" - dixit Clinton diurnariis, sermonibus Nairobiensibus habitis.

Nonnulli greges islamistarum Somalicorum in vicinam Erythraeam migraverunt, postquam anno 2006 e capite Somalico, Mogadishu, expulsi erant ab agminibus Aethiopicis, regimine "laico" Somaliensium faventibus (Vasintonia huic rei tacite adiuvante). Hodie tamen exercitus regiminis praesidentis Ahmed potitur tantum haud magna parte ipsius urbis Mogadishu, tribubus suburbanis a rebellatoribus occupatis. Quam ob rem etiam domina Clinton decrevit se potius in vicina Kenia praesidentem Ahmed conventuram.

Maxima pars Somaliae in anarchia manet ab anno 1991, neque incursus tunc copiarum US-Americanorum huic rei finem ponere valuit.

Scripsit ANL