Annus
2 0 0 9


GREX VICENARIUS LONDINII CONVENIT

GREX VICENARIUS LONDINII CONVENIT

Contentio de stimulis

Ministri rerum fiscalium terrarum sociarum Gregis Vicenarii (G20), qui diebus Veneris Saturnique Londinii conveniunt, videlicet consilia communia capere nequeunt, utrum iam tempus adsit, ut subsidia permagna publica, quae praeteritos duos annos praebebantur oeconomiis crisi globali laborantibus, ad finem iam sint perducenda.

Ita velint Germania Francogallia Iaponiaque, quae tres terrae prima signa monstrant incrementi oeconomiae, productu domestico earum altero trimestre huius anni denuo crescente. Ministri harum terrarum admonent subsidia stimulativa sunt res extraordinariae, quae licet brevi tempore oeconomiam adiuvent, si nimis longe valere pergantur, facile ei nocivae fieri possint, nam re vera significent regimina "pecuniam facilem" quasi immerito mercatui larga manu praebere.

Talibus tamen consiliis reclamabunt sine dubio civitates adhuc crisi laborantes, ut sunt multi "mercatus crescentes" (emerging markets), quamvis desint in eorum numero duae maximae in mundo oeconomiae evolventes - Sinarum et Indiae - quae iam crescere putantur gradu annuali 5-7 centesimarum. Subsidia stimulativa porro valere vult quoque praeses Fundi Monetalis Internationalis (IMF), Dominique Strauss-Kahn.

Altera contentio inter ministros civitatum G20 Londinii convenientium orta esse reportatur de salariis argentariorum sive trapezitarum. Gallica ministra Christine Lagarde vult salaria praesidum argentariarum (praesertim harum, quae subsidiis statalibus modo usi erant) valde minuere, cui rei collega eius Britannus, Alistair Darling, non assentitur, suadens salaria horum hominum pendenda fore ab effectibus fiscalibus ipsarum argentariarum.

Conventum Londinense est quaesi praeludium ad summitatem ductorum terrarum Gregis Vicenarii, qui mense Septembri exeunte conventuri sunt Pittsburghiae US-Americanorum.

 

Scripsit Stanislaus Tekieli



Retro ad:

Novissima editio
Summum paginae