Annus
2 0 0 9


TEHERANIA ASSENTIT,

TEHERANIA ASSENTIT, UT DITATUM URANIUM PEREGRE EVEHAT

Finis rixae de uranio Persico?

Regimen Persarum assensit die Mercurii ad proposita civitatum occidentalium et Russiae, quae spectant ad programma nucleare huius terrae - nuntiavit praeses Internationalis Agenturae Energiae Atomicae (IAEA) Mohamed El Baradei post negotiationes modo habitas Turici Helvetorum.

Repraesentatores regiminis Persiae (sive Iraniae) consenserunt, ut usque finem huius anni 1.200 chiliogramma a se iam ditati uranii Irania traderet Russiae et Francogalliae. Pro quo obtinebit eandem copiam uranii, quod tamen ita ditatum a Russis Gallisve est, ne adhiberi possit ad arma nuclearia facienda.

Qui nuntius omnino inopinatus peritis videtur, nam usque ad diem Lunae duces Iraniani nuntiaverunt se nullo modo assensuros ad flagitationes terrarum occidentalium (imprimis Civitatum Unitarum Americae), ut programma nucleare huius terrae - quo velit Teherania energiam nuclearem producere - aboleatur. Multi tamen viri politici orbis occidentalis timuerunt Iraniam re vera studere, ut arma nuclearia obtineat, quibus minari possit imprimis Israeliae.

Pactum de programmate nucleari a repraesentatoribus Iraniae officialiter firmandum sit proximo die Veneris.

Photographema a satellite facta monstrat fabricam ad oppidum Natanz, ubi uranium Persarum ditatur.

Scripsit Stanislaus Varsoviensis



Retro ad:

Novissima editio
Summum paginae