Joannes Vladislav

Die tertio mensis Martii post diuturnum morbum Joannes Vladislav Pragae mortuus est, poëta et interpres praeclarus. Qui in Slovachia anno MCMXXIII ortus adolescens in Cechas regiones cum familia sua domicilium transtulit et duodeviginti tantum annos natus Wilhelmi Shakespeare brevia carmina in Cecham linguam conversa edidit. Cum autem regimen communistarum in Cechoslovachia rerum potitus est, tertius liber poëmatum ab ipso scriptum interdictus est: Joannes ex universitate expulsus domi opera pueris destinata conficere et poëmata in linguam suam ex extraneis convertere solitus erat, id est ex Anglica Gallica Germanica Italica Dacoromanica Russa Ucraina et, peritis adiuvantibus, ex Sinensi et Japonica.

Anno MCMLXVIII demum studiis perfectis in Pragae universitate philosophiae doctor renuntiatus est et cum nonnullis collegis "Societatem liberorum scriptorum" (Sdružení nezávislých spisovatelu) condidit, sed post Cechoslovachiam invasam vetitus est, ne ullum librum ederet: quapropter officinam editoriam condidit clandestinam, qua et poëmata et scripta non sua tantum sed etiam aliorum edita sunt. Anno MCMLXXVII celebrem libellum "Charta LXXVII" subscripsit, quo complures docti et studiosi democratiam postulabant, posthac in Francogallia exul ut magister vixit. Anno bismillesimo tertio Pragam rediit, ubi libros suos et conversiones edidit. Pluribus praemiis et honoribus labore suo exornatus est.

Scripsit Herimannus Novocomensis