PERCONTATIO ANTHROPOLOGI TORBEN RICK

Mythi de oecologia aetatis lapideae

Collaboratori "Ephemeridis" contigit percontari praeclarum US-Americanum anthropologum, Torben Rick, qui una cum collega sui, Jon Erlandson (ambobus munus apud Universitatem Californianam), in actis "Science" nuper sententiam adhuc solitis contrariam divulgaverunt de cura circumiectorum a hominibus aetathis neolithicae.

EPHEMERIS: Num tantum hodie homines circumiectis crudeliter abutuntur an erat hic mos nobis iam antea?

RICK: Exploratio intensiva naturae sive circumiectorum a homine durat iam saltem nonnulla dena milia annorum. In fabulas reponere debentur mythi anthropologorum primorum decenniorum praeteriti saeculi, qui credebant homines priscos in quadam symbiosi cum natura vixisse ac curasse ne nimis ferarum caperent, quasi sensu quodam inscito ducti oecologiam, ut in aequilibro maneret, curantes.

EPHEMERIS: At non curabant?

RICK: Minime. Quod adhuc fecisse, id est rationes oecologiae plus minusve flocci habuisse, putavimus homines viventes demum in societatibus agricolarum, ergo non ante decem milia annorum in terris "lunulae fertilis" (hodierna Israelia, Syria et Iraquia) aut octo milia annorum in paeninsula Balcanica. Nunc tamen scimus hominem saeve circumiectis abuti iam multo antea.

EPHEMERIS: Quando?

RICK: Inspiciamus oeconomiam marinam, ut dicitur. Hanc adhuc putavimus omnino coepisse non ante quattuor milia annorum. Nunc invenimus vestigia pisces marinas atque animalia crustacea a homine manducata esse in litoribus Africae ante 150 milia annorum. Ante 23 milia annorum in meridionalibus litoribus Europae consumptio crustaceorum erat tantopere magna, ut nonnulla eorum genera multo rariora ac minori corporis magnitudine facta sint. Ante novem usque tria milia annorum gentes inhabitantes hodiernam Californiam insulasque Aleutas venando fere ad extinctionem adduxerunt lutras. Quo effectum est, ut ab his petita echinoidea permagne multiplicaverint, valde nocentia aliis formis vitae marinae.

EPHEMERIS: Possumusne tamen credere homines priscos tantum tot ferarum occidere solitos esse quot ipsi comedere potuerint?

RICK: Hoc quoque non est verum. Vestigia habemus monstrantes homines venatos esse animalia tantum ad cornua eorum corporibus exsecanda, aut dentes, aut pelles exquisitioras, ceteris partibus cadaveris omnino contemptis. Credimus etiam, licet hic desint nobis indicia certissima, homines neolithicos venatos interdum esse ob solam voluptatem necandi.

EPHEMERIS: Sumus ergo hodie minime peiores maiorum?

RICK: Immo meliores.

Scripsit Iohannes Fijak