Annus
2 0 0 9


Valzer con Bashir (

De saltatione cum Basiro

 

(Waltz with Bashir - 2008)

Direxit Ari Folman, imagines descripsit David Polonsky, voces imaginibus descriptis dederunt Ari Folman, Mickey Leon, Ori Sivan, Yehezel Lazarov. In Israël, Germania et Francogallia productum est, distribuit Lucky Red.

Aris Folman Israëlianus in Libano anno MCMLXXXII militavit duodeviginti annos natus. Post novennium cinematum auctor factus est: ab initio pelliculas plerumque documentarias confecit, consensum filmicorum peritorum sibi comparans.

Quid vir adultus de bello cui adolescens interfuerit meminit? Nihil, unam tantum imaginem. Sed somnia iterata et angor Arim tantopere sollicitant, ut illi necessarium sit profundius investigare: inde oritur narratio filmica, quam per quattuor annos auctor perfecit commilitones temporis illius requirens et interrogans. Imaginibus descriptis (animated cartoons) opus confectum est, exceptis ultimis emoventibus minutis.

Animum Aris perturbat caedes Sabrae et Satilae a militiis Christianis ducis sui Basiri Gemayel necem ulciscentibus perpetrata, cui exercitus Israëlianorum iners adfuit. Inde narratio fusca et inquieta oritur, ubi maesta et acerba militum verba paulatim belli atrocitates aperiunt: pavida imperitia bellantium, canum strages, diruta aedificia, olentia cadavera. Inter omnes eminet error militum sclopetantium in medio Beryti foro, quorum unus inopinate ante Basiri Gemayel imagines parietibus fixas saltare coepit: unde pellicula nomen trahit. Haec omnia auctori opus est, ut factorum conscius fiat. Vel acrius animum movent imagines ultimae, oculis admirandae non auribus audiendae. Judaeo tantum talia tam acriter enarrare licet.

Scripsit Herimannus Novocomensis



Retro ad:

Novissima editio
Summum paginae