Annus
2 0 0 9


Amstelodamum (

Amstelodamum (pars tertia)

Duo musaea pueris praesertim grata ut visites exhortor, si Amstelodami aliquamdiu moreris.

NEMO (quod verbum Latinam noscentibus nulla conversione eget) est musaeum scientiae et technologiae dicatum, quod in magno viridi aedificio navis instar haud longe a statione ferriviaria eminet. Puero vel adolescenti intranti tot et talia mirabilia ibi ostenduntur, ut arduum sit ante clausurae tempus eum eripere. Scientiae physica, chemica, biologica plerisque discipulis invisae oblectamentum fiunt visitatoribus: quid sit tensio superficialis, quid vis magnetica et electrostatica, quid atomorum et molecularum structura observant pueri et puellae magna cum delectatione. Etiam vitae scientiarum plurima exempla aspiciuntur, sicut leges Mendelianae, genum et DNAcidi structurae, mentis humanae operandi rationes. Quomodo fluminum aquae potui aptae fiunt? Parva officina in musaeo est, qua visitatores ipsi aquam purgare et potare possunt. Iucundissimae sunt aulae automatis dicatae, ubi pupae et bestiae metallicae viventium instar se moventes ostenduntur; scaccorum tabula praesto est computatro ducta, quae ad pugnam lusores provocat.

Nautarum patria, Batavia colonias in remotis regionibus constituit: inde ortum est Tropicorum Musaeum (Tropenmuseum) gentibus totius orbis dicatum, exceptis tam Europaeis populis quam Europeorum moribus assuefactis. Ergo per magnum aedificium peragrans poteris et nomadum per Asiae tesca errantium tentorium intrare et sepulcreta coloribus decora Austroamericana admirari et domum modicam muslimi cuiusdam visitare et ingentes statuas ligneas feminarum virorum aut deûm ex Africa aspicere. Hoc anno complures imagines ostenduntur Caribici Carnevarii (Caribisch Carnaval), coloribus et personis variae, puerisque et puellis facultas datur ornatus et picturas perficiendi: quotannis enim possis nonnullas expositiones de longinquarum gentium moribus mirari in eodem aedificio. Musaeum est hoc vividum, ter centenis milibus rebus undique conlatis dives, in urbis virenti insula orientali situm.

Scripsit Herimannus Novocomensis



Retro ad:

Novissima editio
Summum paginae