Annus
2 0 1 4


De comitiis Afghanis

De comitiis Afghanis

Finem habuit comitiorum difficiliorum dies in Afghania ubi cives suffragium inierunt ad novum rei publicae eligendum praesidem qui in locum prioris Hamid Karzai succedet. Comitia in incerto fuerunt ob Talebanorum minas iniuriasque iactatas, cum populus vi cotidiana exterreretur. Tamen Solis die septuagies centena milia civium feruntur suffragia tulisse qui, conscii instantium periculorum, etiam locorum incommoda coelumque grave adierunt. Media fere pars Afghanorum optimo iure suffragiis interfuit, ut videtur, e nuntio a rectore comitiorum Ahmad Yousuf Nuristani allato. Feminae iuvenilis aetatis magis pugnaces crebraeque more solito se hilares ostenderunt, manu tenentes tabellas suffragio ferendo, meliore spe de iure concepta.

Tertia comitia praesidalia habita sunt post prima et secunda annorum MMIV et MMIX: transacto decimo tertio anno administrationis praesidis Karzai novi regiminis eligendi in formam civitatis popularis spes est tot rebus turbidis seditiosisque praetermissis. Praeses Obama iam gratulatus est his comitiis maximi momenti hortans ut Afghani officium praestarent in suffragiis computandis et exitus nuntiis afferendis neque ambitui faverent: promisit autem Civitates Unitas Afghanos defensuras esse etiam post omnium nationum virium recessum.

Scripsit Lydia Ariminensis



Retro ad:

Novissima editio
Summum paginae