Annus
2 0 1 4


Diruptio muri Berolini commemoratur

Diruptio muri Berolini commemoratur

Hodierno die 9 mensis Novembris Berolini annus vigesimus quintus commemoratur a muro diruto qui per octo et viginti annos urbem in duas partes diviserat. Una nocte ex abrupto pro reticulo ferreo extructus erat ut cives prohiberentur transire a re publica communistica ad occidentalem opibus capitalibus innixam. Priusquam dirutus esset, CXXXVIII mortem occubuerunt qui a parte orientali exire conati erant . Eventus vigesimi saeculi rerum imago significans est: ob grave discrimen de re oeconomica, sociali, politica hinc terminus rei publicae Germaniae orientalis incepit ac praesertim Unionis Rerum Socialisticarum Sovieticarum, quae Foederatio die 21 mensis Decembris anno 1991 dissoluta est: peropportune Eric J. Hobsbawm historicus Anglus hanc diem signavit in opere “De saeculo brevi”: res maximi momenti illius aetatis factas esse ab anno 1914 ad dissolutionem regiminis sovietici quae a muro deleto Berolinensi initium cepisset.

Sollemnia parata sunt ad hunc diem celebrandum. Angela Merkel commemorationem incepit apud monumentum situm in Bernauer Strasse: hic in reliquiis muri munus iis qui perierunt rosa posita est. “Non solum gaudio afficior - inquit - sed etiam conscia officii mei populi sum: spes illo die res vera effecta est. Murus deiectus ostendit res in melius mutari possunt; hoc nuntio omnibus nationibus: confido omnia moenia violentiae, tyrannidis, inimicitiae deleri posse.”

Hic nuntius maximi momenti est tempore quo minae “belli sine armis” redire videantur, cum nexus inter Russiam et Unionem Europaeam relanguescant vel potius peiores facti sint.

Scripsit Lydia Ariminensis



Retro ad:

Novissima editio
Summum paginae