Annus
2 0 1 4


De Daemonii Temptationibus

De Daemonii Temptationibus

Daemonium et satanismus et similia nunc ubique vigent, hominesque haud parum perturbant. Agitur de magis, de maleficis, de occultismo, de spiritismo, de horoscoporum indagatoribus, de fascinorum amuletorumque venditoribus, et etiam de veris sectis satanicis. Praeter communem opinionem omnia haec eveniunt una cum magno, etsi tantummodo naturali, rerum sacrarum studio; christiani quoque perpauci sectis satanicis adhaerent, quod patenter catholicae religioni contrarium est, ut Ecclesia iampridem missis ambagibus declaravit.

Imprimis quaerendum est utrum daemonium (sive diabolus sive satanas) vere exsistat.

Multi homines docti negant daemonium veram esse personam et non nisi ens ex mithologia depromptum putant; morbi enim et prodigia, quae antea pravis spiritibus daemoniacis tribuebantur, nunc ex rerum natura explanantur sive causis physicis (verbi gratia, procellis) sive causis neurologicis (v. gr. epilepsia vel aliis morbis psychicis).

Egregii tamen philosophi et scriptores, ut Goethe et Dostoiewski , satanam exsistere serio crediderunt, non solum ut maleficam imaginem sed ut personam veram et actualem. Paulus VI Pontifex Maximus de hac re die 15 Novembris anni 1972 in publica admissione doctrinam ecclesiasticam confirmavit: “Malum, inquit, non est solum quaedam deficientia sed etiam efficientia ab ente vivo, spirituali, perverso et perversore. Res vere terribilis, mysteriosa, horrifica […]. Diabolus est inimicus princeps, temptator praecipuus. Scimus enim ex Sacra Biblia hanc personam obscuram et perturbatricem reapse in hoc mundo exsistere, sollerter et perfide continuo operantem, occulteque errores atque infortunia in historia humana seminantem”.

In his rebus, inquit Papa, nulla metaphora usus sum.

Exinde indoles spiritualis diabolicae actionis colligitur, quam ob rem tacite discimus res diabolicas non esse primario rara phaenomena ac in pellicula “Exorcista” monstrantur.

Praecipua probatio de daemonio in Evangeliis invenitur, nam ibi Iesus ipse a diabolo in eremo temptatus est et triumphator omnino discessit. Fides christiana nos docet non solum diabolum exsístere sed etiam eum a Christo victum esse (cf Mt 4,1-11). Quapropter nihil est timendum eis qui vitam christianam degunt, sacramenta frequenter recipiunt (praesertim confessionis et communionis), orationem colunt atque caritatem cum operibus coniunctam.

Excerptum ex Patris Iosephi I. Del Col SDB homilia, die Dominica I Tempore Quadragesimali habita.

In compendium redactum

Scripsit Paulus Kangiser



Retro ad:

Novissima editio
Summum paginae