De novis nummis interretialibus

Pecunia - ut scitur - a pecude venit quod in veterrimis monetis imago vaccina impressa erat; verbum nummus sumptum est a quadam moneta Graeca in Sicilia antiquitus vigenti. Romani vero multas monetas cuderunt vel assem et denarium; etiam nunc nummariae cuiusque nationis centrales privilegium habent nummos cudendi sive metallicos sive chartaceos; in commercio quoque internationali moneta extera utimur quae nummis nationalibus aequalibus comparatur et per aliquam nummariam venditori extero mittuntur.

Nuper inventi sunt nummi interretiales, qui a nulla nummaria nationali gignuntur et pro moneta extera possunt usurpari, ita ut emptor venditori directe nummos electronice mittat; unde hi nummi orti sunt? Satoshius Nakamotus est pseudonymum cuiusdam viri incogniti, qui hos nummos electronicos condidit; re vera nemini est cognitus; etiam putatur non unus sed grex computatralis hanc pecuniam electronicam creavisse; quid sit ergo bitus nummarius (Anglice bitcoin)? Haec est moneta ficta, electronice generata, quam nulla nummaria nationalis vel moderatur vel regit; qui hos nummos accipiant? Hi sunt quidem mercatores qui commercio transnationali utuntur; vendunt et pretium nummos electronicos accipiunt.

Sunt vero nationes ubi hi nummi contra legem iudicantur, propterea quod putatur narcomercatores et venditores armorum illicitos hac pecunia usos esse ut auctoritates oeconomicas vitarent; si ita est, pessime accidit ut hic mercandi modus, qui multis profuisset, nullum probis hominibus ob mercatores illicitos beneficium afferre possit.

Scripsit Paulus Kangiser