Et ascendit in caelum

“Undecim autem discipuli abierunt in Galilaeam, in montem ubi constituerat illis Iesus. Et  videntes eum adoraverunt: quidam autem dubitaverunt.  Et accedens Iesus locutus est eis,  dicens: “Data est mihi omnis potestas in caelo et in terra: euntes ergo docete omnes gentes:  baptizantes eos in nomine Patris,  et Filii,  et Spiritus Sancti:  docentes eos servare omnia quaecumque mandavi vobis: et ecce ego vobiscum sum omnibus diebus,  usque ad consummationem saeculi" (Mt 28, 16-20).

Quoniam Iesus in caelum  ascendit, dicere possumus unum e nobis apud Deum esse. Christum enim non solum  verum Deum sed etiam verum hominem confitemur. Iesus autem in hoc orbe terrarum  iam non est visibilis, sicut discipuli eum viderunt,  sed praesens  est in Ecclesia, quae initium capit in die Ascensionis et  usque ad ultimum diem permanebit, secundum Christi promissionem. Tamen, ut Ecclesia sit perfecta, opus est Spiritus Sancti adventu.

De caelo deque caelesti Spe alloqui, putabatur quondam abalienatio. Sed caelum  desiderare  nec  non vitam aeternam propositum est multorum fundamentale.  Iesus non ascendit ex terra  ut mundi oblivisceretur; immo:  Spiritum Sanctum promisit quo fortiores discipuli essent in Evangelio nuntiando  (Cfr.  Act 1, 8).

In communitate, ubi  Eucharistia celebratur,  Resuscitati praesentiam per fidem sentimus;  et post  actam missam,  Domini praesentiam videmus, v.g. in proximo, praesertim si egenus est, si esurit, si aegrotat.  Olim audire poterimus ea verba ab Hominis Filio dictura in postremo iudicio:  “Quamdiu fecistis uni ex his fratribus meis minimis, mihi fecistis” (Mt 25, 40).

In hoc Ascensionis  festo Ecclesia  celebrat quoque  Diem Mundialem Communicationum.  Non est locus in rebus humanis, praesertim quod mundializationem habemus,  in quo instrumenta communicationis non  facta sint pars essentialis in necessitudinibus inter personas, in mutationibus socialibus,  oeconomicis, politicis, religiosis. Cavendum est ne instrumenta communicationis socialis fiant velut megaphonum materialismi oeconomici et relativismi moralis, quae sunt verae nostri temporis plagae (cfr. Benedicto XVI: Mensaje para la XLII Jornada Mundial de las Comunicaciones Sociales, 2008).

Prudenter igitur his instrumentis utamur, recta doctrina et vigilantia nisi, sub Spiritus Sancti illuminatione.  Oremus pro iis,  qui in instrumenta communicationis  socialis  incumbunt, et maxime pro iis, qui authentica principia humana et Christiana continenter  promovent.

Excerptum compendiarium ex Patris Iosephi I. Del Col SDB homilia, in die festo Ascensionis habita convertens

Scripsit Paulus Kangiser