DE STATUIS AENEIS RHEGII CALABRIAE EXPOSITIS
De statuis aëneis Rhegii Calabriae expositis
Die 28 mensis Decembris anni nuper
praeteriti IV milia visitatorum, usque ad mediam noctem
exspectaverunt dummodo celeberrimas statuas aëneas Ryacii
repertas viserent: nam ante unum mensem, serius quam constitum
erat, apud Musaeum Nationale Rhegii in Calabria Italiae
Meridionalis regione eae publice ostentae sunt. Musaeum
visitatoribus ab anno MCMLIX patens, cuius ratio aedificandi a
praeclaro architecto Marcello Piacentini instituta est, Magnae
Graeciae eximio reliquiarum numero excellit. In qua aula
simulacra exponuntur calor constanter continetur: circiter XX
gradus hieme, non amplius quam XXVII aestate ne nova erosio noxia
patefiat. Praeterea in fundamentis antisismicis insistunt: quae
substructiones pavimento iunctae sunt nexu motus terrae recti et
directi propagatione minuenti.
Simulacra in mari Ionio octo metra in
altitudinem sub aquis anno MCMLXXII inventa sunt non longe ab
oppidi Ryacii litore; diu Florentiae refecta sunt ablatis
sedimentis externis et terra residua salis acidi hydrochlorici
corrosivi satura post fusionem in interiore parte. Opus difficile
et compositum confectum est ad faciem veram scientiae
instrumentorum auxilio restituendam. Statuae
cognominatae litteris “A” et “B”, duorum fere
metrorum, milites nudos, heroum more, effingunt cum hasta in
dextera manu et scuto in sinistra, quibus armis amotis, ut opinio
est, in navi oneraria ante navigationem. In incerto est utrum
artifices fuerint Graeci an Magnae Graeciae; inter omnes
archaeologos eas V saeculo a.Ch. n. fictas esse satis constat.
Magna autem controversia est de agnoscendis imaginibus. Quinam
sunt bellatores? Ex recentioribus cognitionibus simulacra partes
esse unius operis statuarii feruntur: alteri haec Eteoclis et
Polynicis imagines exprimere, alteri Dioscurorum opinantur.
Eximia artuum venustas, omnium partium, vel
minimarum elegantia et congruentia, corporum status, artis
Graecae aetatem splendidissimam revocant, quamvis non concorditer
periti artificem agnoscant, eo magis quod sunt qui existiment
opus in Magna Graecia vel Sicilia factum esse.
Scripsit Lydia Ariminensis
|